Tag Archives: пливање

Придобивките од пливањето

Било која физичка активност е од големо значење, особено пливањето, го подобрува здравјето, а со тоа го продолжува животниот век на човекот. Пливањето е базичен спорт, кој треба да го применува секој човек. Особено е важно да го применуваат децата на возраст од 5 до 15 години. Научно е докажано дека пливањето е првиот спорт со кој децата треба да се сретнат на возраст од 5 години, па нагоре. Овој спорт се изведува во вода, средина која веќе му е позната на детето уште од мајчината утроба. Постојат неколку круцијални причини зошто секое дете треба да научи да плива.

Пливањето како физичка активност:

  1. Позитивно влијае врз кардиоваскуларниот систем.
  2. Ја подобрува работата на локомоторниот апарат.
  3. Ја усовршува моториката на движења.
  4. Ги активира истовремено сите мускули на човечкото тело.
  5. Овозможува социјализација на децата.
  6. Ги прави децата да се чувствуваат сигурни во вода.
  7. Штом ги совладаат пливачките техники, децата се способни сами да се грижат за себе во вода.
  8. Ги ослободува родителите од страв дека нешто непријатно ќе му се случи на навното дете во водата.
  9. Ги релаксира и ги ослободува децата од каков било стрес.
  10. Нема фактор од повреди во вода.
  11. Дете кое знае да плива, може да спаси друго дете кое се дави и не знае да плива.
  12. Водата ги прави децата среќни и им буди весели емоции.

Придобивките од пливањето се многубројни, но исто така има неколку работи кои родителите не треба да ги применуваат на своите деца во вода:
1. Не влегувајте во улога на тренери и не терајте ги со сила децата да пливаат.
2. Не внесувајте ги со сила децата во вода.
3. Не потопувајте му ја главата во вода, доколку детето не го сака тоа.
4. Не трауматизирајте го детето правејки споредби со други деца кои веќе знаат да пливаат

Спротивно на ова:
1. Запишете го детето во најблиското школо за пливање каде ќе ги усоврши и ќе ги научи пливачките техники.
2. Дозволете му на детето прво да ја допре водата, да се приспособи на температурата, па потоа да влезе со целото тело.
3. Бидете трпеливи доколку детето одбива да влезе во вода.
4. Бидете трпеливи доколку детето се плаши и нема желба да биде во вода.
5. Најдете соодветен начин како да го примамите детето да ја засака водата, а тоа значи преку игра, со топка, со пливка, со мускули, со најразлични пластични и гумени играчки за во вода. Многу е важен педагошкиот пристап на возрасните во овие моменти, бидејки во спротивно може да се постигне несакан ефект, а тоа е детето да доживее траума, да се изнаголта вода и сл. и никогаш повеќе да не добие желба за пливање.

Затоа се препорачува децата да ги упатиме кон стручно лице, професор или тренер по пливање, кој има искуство во работа со деца на базен и кој има знаење да спроведе методологија на обука на пливачки техники. Овој процес на усовршување на нови навики во вода, може да трае и по неколку масеци. Тоа е кај секое дете различно, бидејки е исклучително индивидуална процедура. Некои деца учат побрзо, други пак, побавно. Но тоа не значи дека детето нема да научи да плива, напротив, децата релативно брзо ги совладуваат пливачките техники, во однос на возрасните. Многу е полесно да научите дете да плива, отколку возрасен човек. Штом еднаш детето ќе ги усоврши пливачките техники, тие остануваат врежани во централниот нервен систем и веќе се автоматизирани движења. Затоа, можеме доживотно да го применуваме пливањето како составен дел од нашето секојдневие. Пливањето, генерално спортувањето, претставува начин на живот и грижа за сопственото здравје.

м-р Ангелче Гушев-kineziologija.mk

Фелпс ќе има трка со бела ајкула

Мајкл Фелпс (31), повеќекратен првак во пливање со 23 златни олимписки медали и 39 светски рекорди, сега одлучи да се трка со големата бела ајкула.

Трката треба да се одржи наскоро, во организација на Discovery Channel, кој од 23 јули почнува со емитирање на својата тематска програма „Shark Week”, во превод „Седмица на ајкулите“.

Тоа е сезонска програма на Discovery Channel уште од 1988 година, а секоја година има и неколку посебни емисии во кои гостуваат познати личности.

Прв пат во гости е повикан Мајкл Фелпс за да се трка со ајкула. Во најавата на Discovery Channel стои дека никој не се тркал до сега против голема бела ајкула.

Стружанецот Горан Рајчиноски успешен тренер за пливање во Австралија

Горан Рајчиноски од Мислешево, Струга е
Магистер по кинезиологија и спорт (Одредување на биомеханичка структура и оптималност на наставните методи во пливање). Има дипломирано на Факултетот за физичка култура и спорт во Скопје , а веќе долги години е успешен тренер за пливање во далечна Австралија.

Во моментов е главен тренер во клубот COSAC – City of Sydney Aquatic Club каде постигнува одлични резултати со младите пливачи со кои работи.

Горан во Австралија најпрво започна како помошник тренер на Хамид Мобарез во  школата за пливање на славниот Јан Торп (Ian Thorpe Aquatic Centre). Подоцна Горан беше унапреден во главен тренер кога почна да бележи фантастични резултати со  младите пливачи со кои работеше. Тој е особено голема и ефективна поддршка на голем број млади пливачи со одредени пречки. Беше номиниран и за тренер на годината за Годишната награда на лица со пречки во слухот.

На Горан му посакуваме да продолжи со успесите, а порталот www,javisejuzna.mk ќе продолжи да ве информира за неговите успеси.

  • Congratulations Henry Hughes and his Coach Goran Rajchinoski for his 4th place finish in the multi-class 100m Butterfly at the Australian Age Championships.

Томи Стефановски – најголем предизвик е маратонот во Робервал,Канада поради условите слични на Ла Манш

Човекот кој го преплива каналот Ла Манш, победник на Гранд При серијата на ФИНА, примен во куќата на славните во Сан Педро, Сад – сигурно погодувате кој друг ако не Томи Стефановски за читателите на www.javisejuzna.mk со екслузивно интервју.

Кога за прв пат се запознавте со пливањето ?

Како дете на бивш пливач нормално беше уште од мали нозе да бидам покрај базенот, а на 6-7 годишна возраст веќе бев и во базенот и започна таа љубов меѓу мене и пливањето која трае до ден денес.

На самите ваши почетоци најпрвин се натпреварувате на кратки делници односно во базен, потоа се запознавате со ватерполо играта, па најпосле далечинското маратонско пливање. Што ве потикна, што ве мотивираше да настапувате во најтешката дисциплина во пливањето ?

Нормално првите чекори беа во базенот со доста успеси, а потоа другарите ми беа во ватерполо и продолжив во Ватерполо Клубот Вардар кој го направи најголемиот успех ватерполо со освојување на втората лига. Со возобновување на Охридскиот Маратон се јави желба да се обидам да го испливам. Бидејќи во тоа време сеуште тренирав ватерполо и далеку од тоа да имав адекватен тренинг за препливување на еден маратон од 26 километри, така да може да се каже дека “Oхридскиот маратон” е главен “виновник” што се занимавам со овој спорт.

Што треба да поседува еден пливач, за да може да се натпреварува во далечинско маратонско пливање ?

За тоа треба да се поминат сите категории во базенот, и ако има афинитети кон подолги патеки (1500 метри) е предуслов за пливачот да се занимава со овој спорт.

Го имате препливано каналот Ла Манш. Колку време се подготвувавте за овој подвиг? Со кој предизвици и пречки се соочивте на Ла Манш ?

За каналот се подготвува цел живот, сите испливани тренинзи, сите испливани маратонски трки во текот на кариерата те калат да се справиш со предизизвиците кои ти ги поставува Ла Манш. Пречките треба да ги знаеш и претходно и да се испробаш и во тие услови. Ладната вода која тогаш беше 16-18 степени знаев дека ќе ја совладам бидејќи имам пливано во таква вода, меѓутоа струењата, брановите и времето не можеш да ги предвидиш тоа е од Господ.

Победник сте во далечинско маратонско пливање на ФИНА. Што беше клучот на успехот ?

Да оваа година го освоив првото место во Гран При серијата на ФИНА. И пред две години бев во таа ситуација меѓутоа уморот во последните две трки ме победи. Оваа година од маратонот во Канада до Охридскиот Маратон имав три недели што е доволно време да се опоравам. Тоа беше клучот како и илјадниците километри испливани во базенот.

Имате победено на ,,Охридскиот маратон”, ако претпоставам дека тој вие омилен маратон, кој маратон е најголем предизвик за пливање ? Набројте колку маратони има и во кои држави се одржуваат ?

Секако домашната атмосфера си го прави своето, но најголем предизвик е маратонот во Робервал,Канада поради условите кои се најблиски до тие на Ла Манш и се тоа што се случува околу маратонот,организацијата и луѓето од градчето кои живеат за оваа манифестација. Има безброј маратони во светот,а во светската лига се маратоните во Аргентина, Мексико, Канада, Македонија, Италија. Претходно имаше и во Египет, Кина, Словенија, Бразил…

Низ долгогодишната кариера кој ви беше најголема конкуренција ?

Во маратонското пливање секоја трка е различна има различни пливачи така да и кокуренцијата зависи од трката.

Примени сте во ,,Куќата на славнитеСан Педро,Калифорнија- Сад како единствен пливач од Македонија. Како го доживеавте овој настан, како е чуството да сте во ова привилегирано спортско друштво ?

Чуството е прекрасно и треба да се доживее,зборовите не можат да ги опишат тие емоции.

Условите за професионално пливање се ужасни. Вие успешно се изборивте со овој проблем и предизвик. Кој е рецептот и начинот за да можат сите оние кои се занимаваат со пливање да постигнат врни спортски резултати ?

Условите за работа во Скопје се добри, го имаме базенот и фитнесот во СЦ-Борис Трајковски, меѓутоа ужасот е надвор од тоа. За се сум оставен сам на себе и тоа е стварно тешко психички да се издржи.

Рецептот за успех во пливањето е континуираната децениска макотрпна работа и да се оди чекор по чекор бидејќи секое брзање ќе те врати назад.

Кои се вашите идни планови, каква порака ќе им испратите на нашите верни читатели на Јави се Јужна ?

Моите планови повторно се врзани за пливањето, моментално работам како тренер во пливачкиот клуб БЕТА на базенот во СЦ-Борис Трајковски и се надевам дека за некоја година ќе правите интервју со еден од моите пливачи.

На читателите на www.javisejuzna.mk ќе им порачам дека ЉУБОВТА победува се, малку подзаборавивме на неа.

Томи има големо ,,Спортско срце”

Колективните спортови имаат голема медиумска и маркетиншка подршка, тие се атрактивни за гледачите, навивачите и љубителите на спортот. Заинтесираноста е голема пропратена со огромна маса на луѓе присутни на спортските арени, сали, стадиони. На некој начин спортските клубови се претворија во фирми во големи коорпорации, а газдите на тие клубови и најистакнатите нивни спортисти се големи ѕвезди и милионери.

Што е со поединечните спортови?
Мака мачат да привлечат публика, спонзори, а со тоа и квалитетна инфраструктура на која ќе се создавааат спортисти за постигнување на врвни спортски резултати. Спортистите во поединечните спортови се борат со самите себе, се борат со времето, со надворешната влијанија подложни се на огромни физички напори.
Заедничка точка на поврзување на двата вида на спортување е тоа што и едните и другите спортисти (колективни и поединечни) се најголемите амбасадори на своите земји.
Таков еден во многуте имаме и во нашата земја, се работи за Томи Стефановски во далечинско маратонско пливање. Томи има големо ,,Спортско срце” тој имаше дури шест операции на рамото, бројни ситни повреди, а кога требаше да ја привршува својата долга пливачка кариера тој тогаш го достигна својот зенит, ги помери границите на спортските достигнувања и докажа дека талентот претворен во работа и само работа и упорност може да се достигне ,,Недостижното” да се постигнат врвни спортски резултати. Пливачите на далечинско пливање односно маратоните се подложни на екстремни тешки напори, немаат контакт директен со противникот, се борат со самите себе, психологијата е главната карика во тие мигови, се борат со временските прилики, се борат со часовите,минутите секундите. Пливаат 30, 40, 50, 60 километри за да стигнат до целта. Самата препливана успешно делница е за поздравување и оддавање огромна почит кон нив.


Неговата кариера ја започнува најпрвин во базен и кратките делници, се испробува и во ватерполото, за на крај да ја донесе можеби најдобрата одлука за професионалната кариера. Стефановски има на два наврати освоено чеврто место на натпреварувањето на ФИНА, има вицешампионска титула и на крај во последната негова сезона освен освојувањето на ,,Охридскиот маратон” и на последната трка на неговата кариера во Италија, Карпи го освојува шестото место доволно за заверување на шампионската титула на маратонско пливање на ФИНА.
Томи Стефановски е шампион на свои 44 години што му дава уште поголема тежина на неговиот постигнат успех. Во 2009 година истиот тој Томи ни донесе нова радост нова афирмација на нашата земја, го преплива каналот Ла Манш во тешки услови за пливање за 7 часа, 42 минути и 32 секунди што претставува 11 време во историјата на легендарниот канал Ла Манш. Тогаш стана третиот македонец со ова постигнување, пред него тоа го направија Нико Нестор во 1959 година и Атина Бојаџи во 1969 година.


Но тука не е крајот, шлагот на неговата кариера е што доби место во Куќата на славните во овој спорт и е прв пливач кој доаѓа од Македонија. Церемонијата се одржна на 4 ноеври 2016 година во Сан Педро, Калифорнија во Сад. Иста така во таа 2016 година ја добива и наградата ,,13 ноември”, на Сојузот на спортови на град Скопје.
Мал е бројот на спортисти од Македонија што добиле светски почести и признанија, а уште помал е бројот на спортисти од поединечните спортови со вакви и слични достигнувања. Ова е спортско ремек дело кое може самиот да се гордее и да биде задоволен со се што направил, но и целата држава треба да биде горда на успесите и достигнувањата на Томи Стефановски.
Спортските легенди секогаш ќе бидат на највисокиот трон, за младите спортисти да имаат мотивација, да имаат наши идоли, да се огледуваат на нив, а на институциите, федерациите, сојузите, клубовите им преостанува да се нафатат во работа на пронаоѓање и создавање нови спортски македонски величини.
Легендо ”Томи Стефановски” благодариме на се !!!

Пишува: Предраг Јанчески